పరిణీతి-రాఘవ్ పెళ్లి సీక్రెట్స్.. బయటపెట్టిన పురోహితుడు!

నటి పరిణీతి చోప్రా, రాజ్యసభ సభ్యుడు రాఘవ్ చద్దా వివాహం జరిగి చాలా రోజులు గడుస్తున్నా, దానికి సంబంధించిన ఆసక్తికర విషయాలు తాజాగా వెలుగులోకి వస్తున్నాయి. వీరి పెళ్లి వేడుకలను నిర్వహించిన గాయకుడు, వేదిక పురోహితుడు అంకిత్ బత్రా, ఆ హై-ప్రొఫైల్ వివాహానికి సంబంధించిన కొన్ని ఎవరికీ తెలియని వివరాలను తన యూట్యూబ్ చానల్ "వాయిస్ ఆఫ్ వౌస్" ద్వారా పంచుకున్నారు.

ఉదయపూర్‌లోని లీలా ప్యాలెస్‌లో జరిగిన ఈ వివాహ వేడుకకు కోట లాంటి భద్రత ఏర్పాటు చేశారని అంకిత్ తెలిపారు. పెళ్లి పవిత్రతను కాపాడేందుకు అత్యంత కఠినమైన నిబంధనలు అమలు చేశారన్నారు. ఈ క్రమంలో, ప్రియాంక చోప్రా తల్లి మధు చోప్రా తీసిన కొన్ని ఫొటోలను కూడా డిలీట్ చేయమని సెక్యూరిటీ సిబ్బంది కోరారని, భద్రత ఎంత పకడ్బందీగా ఉందో చెప్పడానికి ఇది నిదర్శనమని వివరించారు. మరోవైపు, పెళ్లి మండపంలోకి ప్రవేశించే సమయంలో రాఘవ్ కోసం పరిణీతి ప్రత్యేకంగా రికార్డ్ చేసిన ఒక పాటను ప్లే చేశారని, ఆ క్షణం చాలా భావోద్వేగంగా సాగిందని ఆయన గుర్తుచేసుకున్నారు.

ఈ వివాహంలో మరో ముఖ్య ఘట్టం బారాత్. ఢిల్లీ ముఖ్యమంత్రి అరవింద్ కేజ్రీవాల్, పంజాబ్ సీఎం భగవంత్ మాన్ బారాత్ అంతటా ఉత్సాహంగా డ్యాన్స్ చేశారని, వరుడు రాఘవ్‌ను భుజాలపైకి ఎత్తుకుని సందడి చేశారని అంకిత్ బత్రా చెప్పారు. అయితే, 80 నిమిషాల పాటు సాగిన వివాహ క్రతువులో వారు ఎంతో గౌరవంగా నిలబడి ప్రతి మంత్రం వెనుక ఉన్న అర్థాన్ని తెలుసుకోవడానికి ఆసక్తి చూపారని, అది తనను ఎంతగానో ఆకట్టుకుందని ఆయన పేర్కొన్నారు.

కాగా, పరిణీతి చోప్రా, రాఘవ్ చద్దాల వివాహం 2023 సెప్టెంబర్ 24న జరగ్గా, మే 2023లో వారి నిశ్చితార్థం జరిగింది. ఈ జంటకు 2025 అక్టోబర్ 19న నీర్ అనే కుమారుడు జన్మించినట్లు కూడా అంకిత్ బత్రా తన వీడియోలో వెల్లడించారు.